O‘zbekiston Respublikasi Vazirlar Mahkamasining 2025-yil 19-martdagi 171-son qaroriga binoan tashkil etilgan Adliya vazirligi huzuridagi Yuridik kadrlarni qayta tayyorlash va malakasini oshirish instituti, mamlakatimizda huquqiy davlatni barpo etish yo‘lida muhim burilish nuqtasi bo‘ldi. Zero, ushbu institut nafaqat yuridik sohaga oid bilimlarni yangilash va boyitishga xizmat qiladi, balki adolat, qonun ustuvorligi va shaffoflik tamoyillarini hayotga chuqurroq singdirishga xizmat etadi. Bu dargohda yetishib chiqayotgan mutaxassislar zamonaviy yondashuvlar, xalqaro tajribalar va innovatsion bilimlar bilan qurollanib, xalqimizning huquqiy madaniyatini yuksaltirishda, davlat va jamiyat o‘rtasida adolatli ko‘prik bo‘lishda asosiy kuchga aylanadi. Shu ma’noda, institut nafaqat kasbiy malaka oshirish maskani, balki huquqiy tafakkurni yangilovchi, adolatga intilish ramziga aylangan yangi ma’naviy va intellektual maydondir.

Institut faoliyatining asosiy yo‘nalishlari va vazifalari yuridik kadrlarni qayta tayyorlash va malakasini oshirishdan iborat bo‘lib, bu jarayonga adliya organlari, advokatura, notariat, mediatsiya, sud ekspertizasi, arxiv ishi, huquq fani o‘qituvchilari va boshqa mutaxassislar qamrab olinadi. Shu bilan birga, dual ta’lim tizimi joriy etilib, nazariy bilimlar amaliy kurslar bilan uyg‘unlashtiriladi, innovatsion yondashuv sifatida elektron ta’lim platformalari, masofaviy kurslar va simulatsion mashg‘ulotlardan foydalaniladi. Institut huquqiy siyosat, raqamli huquq, kiberxavfsizlik va xalqaro huquqiy tajriba sohalarida ilmiy-amaliy tadqiqotlarni rivojlantirish bilan bir qatorda, xorijiy oliy ta’lim muassasalari va xalqaro tashkilotlar bilan qo‘shma dasturlar orqali xalqaro hamkorlikni ham kengaytirib bormoqda.

Yuridik kadrlarni qayta tayyorlash va malakasini oshirish instituti bugungi kunda nafaqat huquq sohasi mutaxassislari, balki jamiyatning turli qatlamlariga mansub kasb egalari uchun ham bilim manbai, huquqiy tafakkurni yuksaltiruvchi maskan sifatida maydonga chiqmoqda. Institutning asosiy kontingenti juda keng qamrovli: adliya organlari va muassasalari xodimlari, advokatlar, notariuslar, yuridik xizmat mutaxassislari bu yerda o‘z malakasini oshiradi. Shuningdek, sud ekspertizasi, arxiv ishi, ijro intizomi va murojaatlar bilan ishlash sohasida faoliyat yuritayotgan xodimlar ham zamonaviy bilimlar va amaliy ko‘nikmalarga ega bo‘lib chiqmoqda. Mediatsiya va intellektual mulk sohalarida tashkil etilgan kurslar esa huquqiy jarayonlarning eng nozik qirralarini o‘rganish imkonini bermoqda. Institut yuridik kadrlarni xalqaro standartlar asosida o‘qitishni yo‘lga qo‘yar ekan, oliy ma’lumotli shaxslarni huquqiy mutaxassislik bo‘yicha qayta tayyorlash orqali ularni jamiyat ehtiyojlariga moslab yetishtirmoqda. Bundan tashqari, umumiy o‘rta, o‘rta maxsus va professional ta’lim muassasalarida huquqiy fanlardan dars beradigan pedagoglarning malakasini oshirish, professional va oliy ta’lim tizimida huquqiy bilim berayotgan pedagoglarni yangi bilimlar bilan o‘qitish ham institut faoliyatining ajralmas qismiga aylangan. Bu jarayonda faqat huquq sohasi vakillari emas, balki turli soha egalari uchun ham huquqiy mavzularda maxsus mashg‘ulotlar tashkil etilib, jamiyatda huquqiy ong va huquqiy madaniyatning yuksalishiga keng yo‘l ochilmoqda. Demak, Institut bugun oddiy bir o‘quv muassasasi emas, davlat va jamiyatni huquqiy islohotlar sari yetaklovchi kuchli ma’naviy va intellektual markaz sifatida shakllanmoqda.

Atigi qisqa muddat ichida Yuridik kadrlarni qayta tayyorlash va malakasini oshirish instituti yurtimiz huquqiy ta’lim maydonida sezilarli iz qoldirdi: 2025-yilning dastlabki sakkiz oyida 16 mingdan ortiq tinglovchi yangi bilim va ko‘nikmalarga ega bo‘ldi, 281 nafar fuqarolar yig‘ini raislari mediatsiya sirlarini o‘rgandi, 6,5 mingdan ziyod huquq fani o‘qituvchilari zamonaviy yondashuvlar bilan qurollandi, martaba cho‘qqisiga intilayotgan 572 nafar xodimlar bilimlarini mustahkamladi, 547 nafar “Mahalla yettiligi” vakillari huquqiy savodxonligini oshirdi, 315 nafar arxiv xodimlari esa o‘z kasbiy salohiyatini qayta tikladi. Ushbu raqamlarning har biri oddiy statistika emas, balki institutning qisqa fursatda qanday salmoqli natijalarga erishganini, adolat va qonun ustuvorligini ta’minlash yo‘lida qanday muhim vazifani bajarayotganini yaqqol tasdiqlovchi dalillardir.

Institut bugungi tezkor va raqamli davr talablarini chuqur his etgan holda, ta’lim jarayonini innovatsion tashabbuslar bilan boyitib, uni yanada samarali qilish yo‘lidan bormoqda. “Raqamli institut” platformasining ishga tushirilishi tinglovchilarga nafaqat o‘z bilim darajasini mustaqil baholash, balki shaxsiy rivojlanish dasturini tuzish, o‘zini muntazam ravishda tahlil qilish imkonini beradi. Endilikda davlat xizmatchilari va huquq sohasi vakillari yashab turgan hududidan qat’i nazar, online kurslar va masofaviy ta’lim tizimi orqali bilim olish imkoniyatiga ega bo‘lmoqda — bu esa ta’limni yanada demokratik, erkin va hammabop qiladi. Shuningdek, institut Legal Tech yo‘nalishida butunlay yangi kurslarni joriy etib, sun’iy intellekt, big data, smart-shartnomalar va blokcheyn huquqi kabi eng ilg‘or sohalarda mutaxassislar tayyorlashni boshladi. Bu nafaqat huquqiy tafakkurni kengaytiradi, balki huquqshunoslarni kelajak texnologiyalari bilan uyg‘unlashtirib, ularni yangi davrning talablariga moslashishga chorlaydi. Simulyatsion mashg‘ulotlar va case-study tizimi esa nazariyani amaliyot bilan bog‘lab, huquqiy vaziyatlarni jonli misollar orqali hal etish ko‘nikmalarini mustahkamlaydi. Shunday qilib, Institut nafaqat an’anaviy ta’lim beruvchi maskan, balki huquqiy tafakkurni innovatsion ruhda yangilovchi, kelajak huquqshunoslarini zamonaviy dunyo bilan uyg‘unlashtiruvchi haqiqiy intellektual maydonga aylanmoqda.

O‘zbekiston Respublikasi Adliya vazirligi

huzuridagi yuridik kadrlarni qayta tayyorlash va

malakasini oshirish instituti

Pedagoglar markazi o‘qituvchisi

YOQUBJONOV Ma’rufjon Odiljon o‘g‘li