Mamlakatimizda huquqiy ta’lim va malaka oshirish tizimi doimiy ravishda rivojlanib bormoqda. So‘nggi yillarda amalga oshirilayotgan huquqiy islohotlar, qonunchilikdagi o‘zgarishlar va demokratlashtirish jarayonlari huquqshunoslardan yangi bilimlar va malakalarni talab qilmoqda. Ushbu jarayonlarning muvaffaqiyatli amalga oshirilishi uchun huquqiy ta’lim va o‘qitish tizimining yangi yondashuvlar asosida rivojlanishi muhimdir.

Shu maqsadda, Adliya vazirligi qoshidagi Yuristlar malakasini oshirish markazi va Toshkent shahridagi Xalqaro Vestminster universiteti hamkorligida “Uzbek law I” - “Milliy qonunchilik I” o‘quv kursi tashkil etildi.

Bundan tashqari, talabalar xorijiy davlatlarning huquqiy tajribasini o‘rganish imkoniyatiga ega bo‘ldilar. Darslar yuqori malakali professor-o‘qituvchilar va tajribali amaliyotchilar tomonidan olib borildi.

Hamkorlikda tashkil etilgan o‘quv kursining 1-semestrini tamomlagan 50 nafar talabalarga sertifikatlar topshirildi.

Shuningdek, Yuristlar malakasini oshirish markazi bilan birgalikda o‘quv kurslarini tashkil etishda yaqindan hamkorligi uchun Universitet rahbariyati “Tashakkurnoma” bilan taqdirlandi.

Kelgusida bu hamkorlik yanada kengayib, yuridik ta’limda yangi yo‘nalishlar va imkoniyatlar yaratishda davom etadi.