So‘nggi yillarda raqamli texnologiyalar hayotimizning ajralmas qismiga aylanib bormoqda. Bugun internet, kompyuter, planshet va smartfonlar nafaqat muloqot vositasi, balki bilim olish, o‘qitish va o‘rganishning asosiy manbalaridan biriga aylangan. Ta’lim tizimida ham raqamli texnologiyalar keng qo‘llanilmoqda. Shu bois bu jarayonning imkoniyatlari bilan bir qatorda ayrim muammolar ham mavjud.

IMKONIYATLAR

Raqamli texnologiyalar ta’lim sifatini oshirishda katta imkoniyatlar yaratadi. Avvalo, o‘quvchilar istalgan joyda va istalgan vaqtda o‘qish imkoniyatiga ega bo‘ladilar. Masofaviy ta’lim platformalari, onlayn kurslar va elektron darsliklar yordamida bilim olish jarayoni yanada qulay bo‘ldi.
Masalan, internet orqali dunyoning istalgan universiteti yoki o‘qituvchisidan saboq olish mumkin. Bu esa yoshlarning bilim doirasini kengaytiradi, xorijiy tillarni o‘rganish, dasturlash, dizayn yoki marketing kabi zamonaviy sohalarda o‘z ustida ishlash imkonini beradi.

Bundan tashqari, raqamli vositalar o‘qituvchilarga ham yordam beradi. Ular darslarni yanada qiziqarli qilish, o‘quvchilarning faolligini oshirish uchun turli interaktiv usullar, video, test va simulyatsiyalardan foydalanishlari mumkin. Natijada dars jarayoni biryoqlama emas, balki ikki tomonlama muloqot shaklida kechadi.

MUAMMOLAR

Shu bilan birga, raqamli texnologiyalarni ta’limga joriy etishda ayrim muammolar ham bor. Eng avvalo, texnik vositalarning yetishmasligi muammo bo‘lib qolmoqda. Har bir maktab yoki o‘quv markazida zamonaviy kompyuterlar, internet tarmog‘i va interaktiv doskalar mavjud emas. Bu esa raqamli ta’lim imkoniyatlaridan to‘liq foydalanishni cheklaydi.

Ikkinchi muammo — o‘quvchilarning diqqatini jamlay olmasligi. Ko‘p hollarda internet va gadjetlar o‘quvchi e’tiborini chalg‘itadi: o‘qish o‘rniga ijtimoiy tarmoqlarda vaqt o‘tkazish hollari ko‘p uchraydi. Bundan tashqari, raqamli vositalardan to‘g‘ri foydalanish madaniyatini o‘rgatish ham muhim masala hisoblanadi.

Ba’zi hollarda o‘qituvchilar ham yangi texnologiyalarni to‘liq o‘zlashtira olmayapti. Shu sababli ularga malaka oshirish kurslari tashkil etish, raqamli savodxonlikni kuchaytirish zarur.

XULOSA

Xulosa qilib aytganda, raqamli texnologiyalar ta’lim tizimini yangi bosqichga olib chiqmoqda. Ular orqali o‘qitish jarayoni tez, qulay va samarali bo‘lishi mumkin. Biroq bu imkoniyatlardan to‘liq foydalanish uchun texnik sharoitlarni yaxshilash, o‘qituvchilar va o‘quvchilarning raqamli savodxonligini oshirish muhimdir.
Agar bu yo‘nalishda izchil ishlar amalga oshirilsa, raqamli texnologiyalar kelajak avlodni bilimli, zamonaviy va raqobatbardosh kadrlar sifatida shakllantirishda asosiy vositaga aylanadi.

Raqamli ta’lim texnologiyalari

markazi boshlig‘i O‘.Jalolov