+998 71 200 02 35

Xalqaro hamkorlik bo‘limi


Markazning Xalqaro hamkorlik bo‘limi O‘zbekiston Respublikasi Vazirlar Mahkamasining 2012-yil 28-martdagi “O‘zbekiston Respublikasi Adliya vazirligi qoshidagi Yuristlar malakasini oshirish markazi tuzilmasini takomillashtirish to‘g‘risida”gi 87-sonli qaroriga muvofiq Markazning tarkibiy qismi sifatida o‘z faoliyatini boshlagan.

Shuningdek, bo‘lim ish faoliyati Adliya vazirligi qoshidagi Yuristlar malakasini oshirish markazi direktorining 2019-yil 17-iyundagi 32-um sonli buyrug‘i bilan tasdiqlangan Nizom hamda O‘zbekiston Respublikasi adliya vazirining 2020-yil 29-avgustdagi 149-um-son buyrug‘i asosida olib boriladi.

Xalqaro hamkorlik ikki yo‘nalishda amalga oshiriladi:

- xalqaro tashkilotlar bilan hamkorlikni amalga oshirish hamda;

- yuridik soha vakillarini qayta tayyorlashni amalga oshiruvchi ixtisoslashgan xorijiy ta’lim muassasalari bilan hamkorlikda ish olib borish.

 1.  Markaz bugungi kunda 9 ta xalqaro tashkilotlarning O‘zbekistondagi vakolatxonalari bilan (YXHT, USAID, BMTTD, GIZ, “Mintaqaviy muloqot” XNNT, YTTB, Germaniyaning Konrad Adenauer jamg‘armasining O‘zbekistondagi vakolatxonasi, UNICEF) hamkorlik qiladi hamda ular bilan hamkorlikni yanada rivojlantirish bo‘yicha takliflar ishlab chiqilmoqda.

Jumladan, mazkur hamkorliklar natijasida YXHTning (OBSE) O‘zbekistondagi loyiha koordinatori tomonidan Markazga 12 ta kompyuter jihozlari taqdim etildi hamda AQSH xalqaro taraqqiyot agentligining (USAID) Huquqiy islohotlar dasturi ko‘magida Markaz o‘qituvchilari va xodimlari uchun yuridik ingliz tili (Legal English) o‘quv kurslari tashkil etildi.

Mazkur hamkorliklar natijasi o‘laroq 2022-yil davomida Markazda yuridik kadrlarni qayta tayyorlash va ularning malakasini oshirish sohasiga yo‘naltirilgan jami 36 marotaba xalqaro konferensiya, simpozium, seminar-trening va anjumanlar xalqaro hamkor tashkilotlar (USAID, YXHT, YTTB, “Mintaqaviy muloqot” XNNT, BMTTD, Konrad Adenauyer jamg‘armasi va GIZ) hamkorligida hamda xorijiy davlatlarning (Sloveniya, Buyuk Britaniya, Latviya, Irlandiya, Estoniya, Singapur, AQSh, Germaniya, Ozarbayjon, Rossiya) yetuk ekspertlari ishtirokida tashkil etildi.

Shuningdek, 2022-yil davomida 33 ta xorijiy o‘quv muassasalarining yetakchi ilmiy-pedagogik xodimlari va ekspertlari Markazdagi o‘quv jarayoniga xalqaro tashkilotlar (USAID, YXHT, YTTB, “Mintaqaviy muloqot” XNNT, BMTTD, Konrad Adenauyer jamg‘armasi va GIZ) hamkorligida, xususan Sloveniya, Buyuk Britaniya, Latviya, Irlandiya, Estoniya, Singapur, AQSh, Germaniya, Ozarbayjon, Rossiya va boshqa davlatlardan jalb qilindi.

 2. Markazning xalqaro aloqalarini yanada kuchaytirish maqsadida hozirgi vaqtda Ozorbayjon, Latviya, Turkiya, Rossiya hamda Yaponiya davlatlarining tegishli muassasalar bilan hamkorlik aloqalarini o‘rnatish bo‘yicha Memorandum loyihalarini ishlab chiqish bo‘yicha tashkiliy ishlar amalga oshirilib, Yaponiya Adliya vazirligining ilmiy-tadqiqot va ta’lim instituti Xalqaro hamkorlik boshqarmasi bilan 2023-2025–yillarga mo‘ljallangan “Hamkorlik dasturi” imzolanish arafasida.

Shu vaqtga qadar xorijiy ta’lim va ilmiy tadqiqot muassasalari bilan hamkorlikni rivojlantirish maqsadida Markaz tomonidan Yaponiya, Qozog‘iston, Ozorbayjon, Rossiya va Belarus davlatlarining turdosh tashkilotlari bilan 10dan ziyod hamkorlikdagi ishlar/tadbirlar amalga oshirildi.

Xususan, Qozog‘iston Respublikasi Oliy sudi qoshidagi Odilsudlov akademiyasi rektori Baymoldina Z.X. hamda Belarus Davlat universitetining Sudyalar, prokurorlar, Sud va Adliya xodimlarini qayta tayyorlash va malakasini oshirish instituti direktori Zdrok O.N. “Yurist axborotnomasi” elektron jurnali Tahrir hay’ati a’zolari hisoblanadi. Shuningdek, Yaponiya Adliya vazirligining ilmiy-tadqiqot va ta’lim instituti (Institut) bilan ilmiy axborot almashinuvi doimiy ravishda amalga oshirib kelinmoqda.

Ma’lumot uchun: 2022-yilning 30-mart kuni Institut xalqaro hamkorlik departamenti ilmiy ishlar to‘plamining maxsus - ICD NEWS yangiliklari to‘plamning 20 yilligiga bag‘ishlangan sonida Ommaviy-huquqiy fanlar kafedrasi dotsenti, yu.f.n. Shaxnoza Ganibayevaning “New in the Constitution of Uzbekistan: Securing the guarantee of the rights of youth” – “O‘zbekiston Konstitutsiyasida yangilik: Yoshlar huquqlarini kafolatlash” nomli maqolasi chop ettirildi.

Markazning “Yurist Axborotnomasi” jurnalining 2022-yil 2-sonida Institut xalqaro hamkorlik departamenti boshlig‘i NAITO Shintaroning “Overview of Drafting Legislative Bills in Japan –Focusing on Avoiding Inconsistency in Laws” nomli maqolasi chop etildi.

Shuningdek, Markaz dotsenti, y.f.n. Ganibayeva Sh.K. Qozog‘iston Respublikasi Oliy sudi qoshidagi Odilsudlov akademiyasi jurnalining Tahririyat kengashi a’zosi hisoblanadi.

Bundan tashqari, 2022-yil mobaynida 10 nafar Markaz xodimlarining 8 ta xorij davlatlariga jumladan, Shvetsiya, Singapur, Rossiya, Turkiya, Sloveniya, Latviya va Qozog‘iston davlatlariga xizmat va o‘quv safarlari tashkil etildi.

Qolaversa, Markazda olib borilayotgan o‘quv jarayonini takomillashtirish maqsadida Amerika, Arab, Osiyo, Yevropa, MDH davlatlarning (AQSh, Argentina, Avstriya, Buyuk Britaniya, Armaniston, Belarus, Vengriya, Germaniya, Gruziya, Chili, Kanada, Rossiya, Fransiya, Ozarbayjon, Tojikiston, Qozog‘iston, Qirg‘iziston va boshqalar) 50 ga yaqin turdosh ta’lim muassasalari bo‘yicha ma’lumotlar bazasi shakllantirilgan hamda ular bilan aloqalarni o‘rnatish bo‘yicha tegishli ishlar olib borilmoqda.